GWAMNATIN JIHAR JIGAWA TA DAUKI MALAMAN MAKARANTAR SAKANDIRE SU 2002. DOMIN KOYARWA
JIGAWA TA ƘARA DAUKAR SABABIN MALAMAN SAKANDARE 2,020
Gwamnatin Jihar Jigawa ta ƙara yawan ma’aikatan koyarwa a jihar, bayan da aka gabatar da takardun ɗaukar aiki ga sabbin malamai 2,020 da aka ɗauka domin koyarwa a makarantun sakandare.
Ɗaukar malaman na daga cikin matakan da gwamnatin jihar ke ɗauka domin ƙarfafa harkar ilimi, musamman ta hanyar rage ƙarancin ƙwararrun malamai da kuma inganta rabon malamai da ɗalibai a makarantun jihar.
A yayin bikin gabatar da takardun ɗaukar aikin da aka gudanar a Banquet Hall na Gidan Gwamnatin Jihar Jigawa da ke Dutse, an bayyana cewa daga cikin sabbin malaman, 1,100 an ɗauke su aiki na dindindin tare da tsarin fansho, yayin da 920 aka ɗauke su ƙarƙashin shirin J-Teach.
Gwamnan Jihar Jigawa, Malam Umar Namadi, wanda ya jagoranci bikin, ya ce ɗaukar malaman na da nufin magance ƙarancin ƙwararrun malamai da kuma inganta adadin malamai idan aka kwatanta da yawan ɗalibai a fadin jihar, musamman a yankunan karkara da ba sa samun isasshen kulawa.
Gwamnan ya ce, “Kusan wata guda da ya gabata, mun samar da kayan makaranta, jakunkuna da kayan rubutu ga dubban ɗalibai a faɗin jihar domin inganta damar samun ilimi da kuma kyautata yanayin koyo. A yau kuma, muna ƙara cika wannan ƙoƙari ta hanyar ƙara yawan malaman koyarwa da kuma tura ƙwararrun malamai zuwa makarantun da suke fama da matsanancin ƙarancin malamai, musamman a yankunan karkara.”
Ya ƙara da cewa ɗaukar malaman na nuna wani sabon mataki na ƙoƙarin gwamnatin jihar na ƙarfafa ma’aikatan koyarwa tare da samar da guraben aikin yi ga matasa masu ƙwarewa.
Malam Namadi ya bayyana cewa zuba jari a fannin ilimi bai kamata ya tsaya kan gina gine-ginen makarantu da samar da kayan koyo kawai ba, yana mai cewa samun isassun ƙwararrun malamai masu ƙwazo a makarantu na da matuƙar muhimmanci.
Ya ce a wannan zamani da duniya ke saurin sauyawa sakamakon ci gaban fasahar sadarwa da bayanai, akwai buƙatar mutane su samu ilimi, ƙwarewa da kayan aikin da ingantaccen ilimi ke samarwa domin su samu damar rayuwa da yin gogayya a duniya.
Gwamnan ya ce wannan ne ya sa gwamnatin jihar ke ci gaba da ware kaso mai tsoka daga kasafin kuɗinta na shekara-shekara domin bunƙasa ilimi.
Ya kuma jaddada cewa zuba jari wajen gina ajujuwa, samar da kujeru da tebura, kayan koyarwa, fasaha da inganta tsarin gudanar da makarantu, dole ne ya kasance tare da samar da isassun ƙwararrun malamai masu ƙwazo da kuma samun cikakkiyar kulawa.
Gwamnan ya ce gwamnatin jihar za ta ci gaba da bai wa ci gaban malamai muhimmanci, ciki har da horas da sababbin malamai, ci gaba da horarwa da sake horarwa, inganta hanyoyin koyarwa da kuma bunƙasa ƙwarewar malamai ta hanyar Teacher Development Agency.
A cewarsa, ɗaukar malaman ya cika wani alkawari da gwamnatin ta yi tun farkon hawanta mulki, na inganta rashin daidaiton adadin malamai da ɗalibai ta hanyar ɗaukar ƙwararrun malamai, ci gaba da horaswa da sake horaswa, da kuma samar da tsarin rarraba malamai cikin adalci.
Ya ce manufar ba ita ce kawai a ƙara yawan ma’aikata ba, sai dai a tabbatar da cewa kowace makaranta, musamman waɗanda ke yankunan karkara, ta samu isassun ma’aikatan da suka dace domin samar da ingantaccen koyarwa da ilmantarwa mai ma’ana.
Gwamnan ya bayyana cewa sabbin ɗaukar malaman na daga cikin wani babban shiri na ƙara yawan ma’aikatan koyarwa tun bayan da gwamnatin sa ta hau mulki.
Ya ce tun daga shekarar 2023, shirin J-TEACH ya samar da ma’aikata 7,500 a fannin ilimin firamare da ƙananan sakandare, inda daga cikinsu aka mayar da 3,000 zuwa aikin dindindin tare da tsarin fansho bayan sun samu horo kuma sun tsallake tsarin zaɓe na gasa.
A matakin ilimin bayan firamare, kusan 2,000 ma’aikata sun shiga aikin ta wannan shiri, inda daga baya 1,000 suka samu matsayin aiki na dindindin.
Ya ce waɗannan matakai sun ƙara ƙarfi ne sakamakon tura malaman da suka kammala jami’a sama da 2,100, tare da ɗaukar kusan ma’aikatan koyarwa da waɗanda ba na koyarwa ba 600 domin manyan makarantun sakandare da sauran makarantun kwana na sakandare da ke faɗin jihar.
Malam Namadi ya tabbatar wa sabbin malaman cewa gwamnatin jihar za ta samar musu da dukkan goyon bayan da ya dace, tare da buƙatar su nuna ƙwarewa, ladabi, da jajircewa wajen kare muradun ɗalibai.
“Gwamnati za ta tallafa muku ta hanyar ingantaccen horon fara aiki, jagoranci, sa ido da kuma tantance aikin ku cikin adalci,” in ji shi.
Haka kuma, Gwamnan ya yaba wa Guaranty Trust Bank (GTBank) bisa bayar da gudunmawar kekuna 450 ga ɗaliban da ke yin doguwar tafiya zuwa makarantu a wasu yankunan da ke da wahalar isa.
Ya ce wannan tallafi zai rage wahalar zirga-zirgar ɗaliban zuwa makaranta a kullum, tare da taimakawa wajen inganta zuwa makaranta cikin lokaci, halartar karatu da kuma rage yawan ɗaliban da ke daina zuwa makaranta a yankunan da abin ya shafa.
