Gwamna Namadi: Ilimi, Ƙwarewa, Gaskiya da Kwarewar Aiki Za Su Ci Gaba da Zama Tushen Naɗe-naɗe a Jigawa
Gwamnan Jihar Jigawa, Malam Umar Namadi, ya jaddada cewa gwamnatinsa za ta ci gaba da yin naɗe-naɗe ne bisa cancanta, ƙwarewa, ilimi, riƙon amana da gogewar aiki, domin tabbatar da ingantaccen shugabanci da gudanar da gwamnati yadda ya kamata.
Gwamnan ya bayyana hakan ne yayin bikin rantsar da Mai Ba da Shawara na Fasaha guda ɗaya da kuma Masu Ba da Shawara na Musamman guda biyar a Fadar Gwamnatin Jihar da ke Dutse.
Ya ce wannan wani muhimmin mataki ne na ƙara ƙarfafa tsarin gudanar da gwamnati domin ci gaba da aiwatar da manufar gina Jihar Jigawa mai ci gaba.
A cewarsa, “Yau wata muhimmiyar rana ce a tafiyarmu ta gina Jigawa mafi inganci. Mun rantsar da Mai Ba da Shawara na Fasaha guda ɗaya da Masu Ba da Shawara na Musamman guda biyar domin ƙarfafa tsarin gwamnati tare da tabbatar da cewa tafiyarmu ta gina Jigawa tana ci gaba yadda ya kamata.”
Gwamna Namadi ya bayyana cewa naɗin waɗannan jami’ai ya yi daidai da manufar gwamnatinsa ta zaɓen mutane masu ilimi, ƙwarewa, riƙon amana da gogewar aiki, waɗanda za su bayar da gudunmawa wajen ci gaban jihar.
Ya ƙara da cewa bayanan tarihin waɗanda aka rantsar sun nuna cewa dukkansu mutane ne masu basira, nagarta da ƙwarewar da za ta taimaka wajen cimma burin gwamnatin Jigawa.
Gwamnan ya kuma buƙaci sabbin masu ba da shawarar da su kasance masu biyayya ga rantsuwar da suka yi, yana mai tunatar da su cewa riƙon muƙamin gwamnati amana ce da ke buƙatar gaskiya, jajircewa da ɗaukar alhaki.
Ya ce, “Ku riƙa tuna rantsuwar da kuka yi, kuma ku bari ta zama jagora a dukkan ayyukan da za ku gudanar wajen yi wa jihar hidima.”
Hakazalika, Gwamna Namadi ya yaba da haɗin kai da sabbin jami’an suka nuna tun kafin fara aiki, yana mai cewa hakan alama ce ta shirinsu na yin aiki tare domin cimma manufofin gwamnati.
Ya tabbatar musu da cewa sun shiga gwamnati mai fifita aikin haɗin gwiwa, tare da bayyana ƙwarin gwiwarsa cewa za su yi aiki cikin haɗin kai da sauran jami’an gwamnati wajen bunƙasa ci gaban Jihar Jigawa.
Sabbin jami’an da aka rantsar sun haɗa da: Muftahu Sa’adu Kiri a matsayin Mai Ba da Shawara na Fasaha kan Harkokin Ilimi Mai Zurfi; Hajiya Salma Wakili a matsayin Mai Ba da Shawara na Musamman kan Harkokin Kasuwanci da Ƙarfafa Matasa; Adamu Yusuf Garkuwa a matsayin Mai Ba da Shawara na Musamman kan Harkokin Hajji; Mubarak Aliyu a matsayin Mai Ba da Shawara na Musamman kan Hulɗar
Gwamnatoci; Musbahu Rabi’u Kaugama a matsayin Mai Ba da Shawara na Musamman kan Bunƙasa Zuba Jari; da Bala Sule Kila a matsayin Mai Ba da Shawara na Musamman kan Harkokin Ƙungiyoyi Masu Zaman Kansu (NGOs).
