Gwamna Namadi Ya Sake Karɓar Masu Sauya Sheƙa daga PDP, Ya Yi Alƙawarin Adalci a APC
Gwamnan Jihar Jigawa, Malam Umar Namadi, ya sake karɓar wasu fitattun ’yan siyasa da suka sauya sheƙa daga jam’iyyar PDP zuwa jam’iyyar APC, yayin da jam’iyyar ke ci gaba da ƙarfafa tasirinta a faɗin jihar.
Sabbin mambobin jam’iyyar APC sun haɗa da Alhaji Sani Haru Babura daga ƙaramar hukumar Babura da kuma Alhaji Mustapha Sule Tankarkar daga ƙaramar hukumar Sule Tankarkar. Dukkaninsu sun zo tare da shugabannin jam’iyya da magoya bayansu daga yankunansu.
Taron da aka gudanar a Fadar Gwamnati da ke Dutse ya nuna yadda jam’iyyar APC ke ƙara samun karɓuwa, tare da halartar masu fafutukar siyasa daga tushe da kuma gogaggun ’yan siyasa da suka daɗe suna taka muhimmiyar rawa a al’ummominsu.
Da yake jawabi bayan karɓar su, Gwamna Namadi ya bayyana wannan ci gaba a matsayin mai muhimmanci, yana mai cewa mutanen biyu sun shafe kusan shekaru 30 a jam’iyyar PDP kafin yanke shawarar sauya sheƙa.
Ya ce, “Waɗannan mutane ne da suka yi shekaru 28 a PDP ba tare da tunanin canza jam’iyya ba. Yau kuma, da ikon Allah, sun zo APC.”
Gwamnan ya jaddada irin tasiri da kima da suke da shi, yana mai bayyana su a matsayin mutane masu gaskiya da amana, tare da kyakkyawar alaƙa da jama’a.
Ya ƙara da cewa, “Ci gaba da shigowar sabbin mambobi cikin APC na nuna yadda jama’a ke ƙara yarda da shugabanci da alkiblar jam’iyyar a jihar.”
“Saƙo a bayyane yake—APC ita ce babbar jam’iyya a Jigawa. Ko dai ka shiga cikin jirgin tafiyar nan ko kuma a bar ka a baya. Jirgin yana tafiya.”
Gwamna Namadi ya tabbatar wa sabbin mambobin cewa za a haɗa su gaba ɗaya cikin tsarin jam’iyyar ba tare da nuna bambanci ba.
“Za a yi muku adalci kamar sauran tsofaffin mambobi. Ba za a nuna wariya ba, kowa za a tafiyar da shi tare,” in ji shi.
Ya kuma jaddada cewa burin gwamnatinsa da na jam’iyyar shi ne ci gaban jihar Jigawa, musamman wajen samar da damammaki ga matasa da inganta rayuwar al’umma.
A nasu ɓangaren, Alhaji Sani Haru Babura da Alhaji Mustapha Sule Tankarkar sun bayyana cewa halayen Gwamna Namadi na gaskiya da adalci ne suka ja hankalinsu zuwa APC, tare da irin ayyukan ci gaba da yake aiwatarwa a jihar.
Sun kuma yi alƙawarin yin aiki tukuru domin tabbatar da nasarar jam’iyyar APC a dukkan matakai a zaɓe mai zuwa.
Kakar zaben shekara ta 2027 na karatowa jam, iyyar Apc na samun tagomashi a jihar Jigawa
