Ma’aikatar Lafiya ta Kano Ta Jaddada Muhimmancin Shayar da Jarirai Nono Kawai da Kuma Ilimin Gina Jiki
Ma’aikatar Lafiya ta Jihar Kano ta jaddada muhimmancin shayar da jarirai nono kawai (Exclusive Breastfeeding) tare da wayar da kan al’umma game da muhimmancin ingantaccen abinci mai gina jiki, musamman domin kare lafiyar mata da yara.
An bayyana hakan ne yayin wani taron manema labarai da Babban Sakatare na Ma’aikatar Lafiya ta Jihar Kano ya gudanar a madadin Kwamishinan Lafiya, domin tattaunawa kan Makon Shayar da Jarirai Nono na Duniya (World Breastfeeding Week) da kuma Ranar Matasa ta Duniya (International Youth Day).
A yayin taron, Babban Sakatare ya yi maraba da kungiyoyi da hukumomin da suka halarci taron, ciki har da UNICEF, CS-SUNN, Jhpiego, Core Group, SPHCDA da Rahama Initiative, inda ya yaba da irin gudunmawar da suke bayarwa wajen inganta harkokin lafiya da gina jiki a jihar.
Ya bayyana cewa, shayar da jariri nono kawai a farkon watanni shida na rayuwarsa na da matukar muhimmanci wajen samar masa da ingantaccen abinci da kariya daga cututtuka, tare da taimakawa wajen samun lafiyayyen ci gaba.
Ya kuma jaddada bukatar kara wayar da kan al’umma kan ilimin gina jiki, musamman a cikin al’ummomin karkara, domin tabbatar da cewa iyaye da matasa sun fahimci muhimmancin cin abinci mai inganci da daidaito.
Haka kuma, ya bukaci manema labarai da su ci gaba da gudanar da ayyukan wayar da kan jama’a kan muhimmancin shayar da jarirai nono da kuma ingantaccen abinci, domin kara fahimtar al’umma da kuma inganta lafiyar jama’a.
Da yake magana kan matasa, ya bayyana cewa ingantaccen abinci na taka muhimmiyar rawa wajen bunkasa lafiyar matasa, karfinsu da basirarsu, wanda hakan ke da alaka kai tsaye da ci gaban kasa.
An kammala taron da godiya ga dukkan abokan hulɗa da kungiyoyin da suka taimaka wajen gudanar da shirin, sannan aka gudanar da zaman tambayoyi da amsoshi (Q&A) tsakanin jami’an ma’aikatar da ‘yan jarida.
Muryar Arewa A Yau.com ta rawaito cewar Babban jami,i na Cssunn Salman ya jaddada aniyar ta Cssunn tare da jan hankalin Gwamnatocin jihohi dasu kula tare da Bada hutun watanni shida ga mata masu juna biyu zuwa haihuwa tare da yin kira ga,iyaye su tabbata sun kula da baiwa jarirai Nonon uwa zalla da kuma Abinci mai gina jiki, kamar ya’yan itace da irin su kwai kifi nama dan inganta lafiyar su.
Salman ya ja hankalin iyaye mata da su kula da tsaftar yara da ta jikinsu.
CSSUNN itace kan gaba wajen wayar da kai da yayata mahimmancin abinci mai gina jiki da kuma yadda za,a kula da jarirai wajen basu Nonon uwa zalla da yaki da cututtukan da ke Addabar kananan yara masu tasowa da mata masu juna biyu