Gwamnatin Kano Za Ta Baiwa NIPR Fili Don Gina Babban Ofishinta
Daga Ismaila Ammai Maizare
Gwamnatin Jihar Kano ta sake jaddada aniyarta ta tallafawa ƙwararrun ma’aikatan Hulɗa da Jama’a (Public Relations) da ’yan jarida, inda ta bayyana cewa ta kammala shirye-shiryen ware wa reshen Cibiyar Hulɗa da Jama’a ta Najeriya (NIPR) na Jihar Kano fili domin gina babban ofishinta na dindindin.
Daraktan Janar na Yaɗa Labarai da Hulɗa da Jama’a na Gidan Gwamnatin Kano, Alhaji Sanusi Bature Dawakin Tofa, ne ya bayyana hakan yayin da ya karɓi tawagar NIPR Kano a madadin Gwamnan Jihar Kano, Alhaji Abba Kabir Yusuf, a Gidan Gwamnatin jihar.
Tawagar NIPR ta gudanar da tattakin farko na World Public Relations Day Walk a Kano, wanda ya ƙare a Gidan Gwamnati, a matsayin wani ɓangare na shirye-shiryen bikin Ranar Hulɗa da Jama’a ta Duniya ta 2026.
A yayin gabatar da bayanin tattakin ga Gwamna, Ɗan’uwan NIPR kuma tsohon mamba a Majalisar Zartarwa ta Cibiyar, Farfesa Sule Yau Sule, ya bayyana cewa an shirya tattakin ne domin fara shirye-shiryen bikin Ranar Hulɗa da Jama’a ta Duniya, wanda za a gudanar a Abuja, Najeriya, a watan Nuwamba 2026.
Da yake magana a madadin Gwamna Abba Kabir Yusuf, Alhaji Sanusi Bature Dawakin Tofa ya ce gwamnatin jihar ta kashe makudan kuɗaɗe wajen tallafa wa horaswa, sake horaswa da jin daɗin ƙwararrun ma’aikatan Hulɗa da Jama’a da ’yan jarida a jihar.
Ya ce gwamnati na ganin muhimmiyar rawar da ƙwararrun masu hulɗa da jama’a da ’yan jarida ke takawa wajen inganta sadarwa, wayar da kan jama’a da kuma isar da sahihan bayanai ga al’umma.
Daraktan Janar ɗin ya kuma bayyana cewa gwamnatin jihar ta kammala shirye-shiryen ware wa NIPR Kano fili, domin cibiyar ta samu damar gina babban ofishinta na dindindin da zai kasance cibiyar gudanar da ayyukanta a jihar.
Ya ce wannan mataki na daga cikin ƙoƙarin gwamnatin jihar na ƙarfafa ƙungiyoyin ƙwararru tare da samar musu da tallafi da abubuwan more rayuwa da za su taimaka wajen gudanar da ayyukansu yadda ya kamata.
A nasa jawabin, Farfesa Sule Yau Sule ya yaba wa gwamnatin Kano bisa ci gaba da tallafawa NIPR da sauran ƙwararrun masu aikin sadarwa, tare da jaddada muhimmancin tattakin wajen wayar da kan jama’a kan rawar da harkar Hulɗa da Jama’a ke takawa.
Ana sa ran bikin Ranar Hulɗa da Jama’a ta Duniya ta 2026 zai haɗa ƙwararrun masu aikin Hulɗa da Jama’a da sauran masu ruwa da tsaki a Abuja a watan Nuwamba, domin tattauna ci gaban sana’ar da kuma ƙara haskaka gudunmawar da harkar Hulɗa da Jama’a ke bayarwa ga al’umma.a NIPR Fili Don Gina Babban Ofishinta.o